Општина Гостивар да ги ослободи фирмите од дел од давачките, бара советничката група на СДСМ

Советничката група на СДСМ во Советот на Општина Гостивар смета дека фирмите треба да бидат ослободени од одредени давачки кон општината, за да им се помогне во пребродување на финаниските последици од коронакризата. На последната седница на Советот, којашто се одржа неделава онлајн, тие побараа општината да најде начин преку соодветни мерки да излезе во пресрет на локалната економија.

„Со оглед на новонастанатата состојба како последица на коронавирусот, фирмите во Гостивар се соочуваат со финансиски потешкотии. Владата презема економски мерки со цел да се ублажат последиците од оваа состојба. Бараме во најбрз можен рок, а најдоцна до следната седница на Советот, службата за финансии на општината да изготви мерки со кои ќе се овозможи ослободување на дел од давачките на фирмите кон локалната самоуправа. Тука се подразбира делумно или целосно ослободување од фирмарина, намалување на цените за закуп на летните бавчи, на сметките за вода, смет и слично“, рече координаторот на советничката група Зоран Ангелов.