Општина Гостивар ќе дава до 5.000 денари субвенции за купување велосипеди

Почесто користење на велосипедите како превозно средство, за почиста животна средина во Гостивар. Со ваква цел локалната самоуправа ќе доделува субвенции за купување на велосипед. Мерката е дел од општинската Програма за заштита на животната средина и природа за 2020-та година.

Општината на граѓаните ќе им надомести дел од трошоците при купување на велосипед и тоа во висина од 50% од вредноста, но не повеќе од 5.000 денари.

Освен тоа, ќе се набавуваат и велосипеди кои граѓаните ќе може да ги изнајмат за симболична цена.

„Едни од мерките во Програмата за заштита на животната средина годинава се субвенионирање за инвертери и за велосипеди. Сметам дека ова е добра акција, и со субвенции за купување на велосипеди би требало да бидат опфатени од 200 до 300 граѓани. Планираме во центарот на градот да поставиме и пункт за изнајмување на велосипеди по една симболична цена, да ги мотивираме граѓаните што повеќе да користат велосипеди, наместо автомобили кои се извор на загадување.“, вели Арбен Таравари, градоначалник на Гостивар.

Аплицирањето за субвенциите ќе трае до први септември или до исцрпување на предвидените финансиски средства од буџетот за оваа намена.

Велосипедот треба да биде купен во период од 3 февруари до 1 септември 2020 година, а услов за добивање пари од општината за оваа намена е платен данок на имот до 2019-та година.