Општина Гостивар ќе додели 1 милион денари за помош на семејствата на настраданите и повредените во кочанската трагедија

Од буџетот на Општина Гостивар ќе бидат издвоени 1 милион денари како помош за семејствата на загинатите и повредените во трагичниот пожар што се случи во дискотека во Кочани. Одлуката беше донесена денеска, на вонредна седница на Советот на општината.

Градоначалникот Ваљбон Лимани истакна дека иницијативата за седницата е преземена со поддршка од сите советници:

„По настанот во Кочани, презедов иницијатива знаејќи дека ќе ја имам поддршката од сите советници. Одлучивме да издвоиме симболична сума од еден милион денари за семејствата на загинатите. Повеќе од кога било ни е потребна сплотеност. Споделената радост е поголема радост, споделената тага е помала тага. Во иднина да се собираме само за убави поводи,“ изјави Лимани.

Со голема тага и сочувство се обрати и претседателот на Советот, Намик Дурмиши:

„Не постојат зборови за оваа трагедија. Со длабока тага ја доживуваме и искрено се надеваме никогаш да не се повтори. Апелирам до сите граѓани да бидеме обединети и да им помогнеме на семејствата на настраданите, молејќи се за побрзо закрепнување на повредените.“

Од име на советничката група на ДУИ, Вјолца Бафтиу Зулбеари прочита телеграма со сочувство, истакнувајќи дека ова е рана која никогаш нема да зарасне.

Седницата почна со едноминутно молчење во чест на жртвите од катастрофата што ја зави Македонија во црно. Советниците изразија надеж за што поскоро оздравување на повредените.