Општина Гостивар: Министерството сака во училиштата да ги врати директорите кои правеле злоупотреби

На денешната прес конференција во општина Гостивар, портпаролот Јасин Демири обвини на неправилности во работењето на претходната управа на средното техничко училиште во однос на вработувања на професори.

„Откако ги одзеде ингеренциите на општината во образованието, имаме информации дека Министерството сака да ги врати старите директорите кои правеле злоупотреби. За пример, во средното техничко училиште, професор по архитектура предавал англиски јазик, професор со завршена фармација предавал математика, а професор по бизнис имал 4 часа екстерно тестирање, 2 часа фотокопирање, 2 часа за одржување фејсбук страна. Ова воопшто нема логика. Вакви случаи имаме многу, злоупотреби има многу, имаме и документација, а известени се и сите инспектори“, изјави портпаролот Демири.

Министерството за образование ги одзеде ингеренциите на градоначалникот Таравари во делот на разрешување и поставување директори во училиштата со објаснување дека ги прекршил законите за основно и средно образование и дека не постапил по укажувањата на Просветниот инспекторат.