Општина Гостивар во регионален проект за животна средина, доби грант од 83.000 евра

Општина Гостивар ќе црпи искуства и практики од италијански општини за справување со климатските промени и зачувување на животната средина. Гостиварската општина е единствена од Македонија која е дел од проектот ИПА Адрион – Natured во кој се вклучени десетина балкански општини како и Унијата на општини од Италија како лидер. Проектот предвидува мерки за животна средина и креирање локални политики и планови за ублажување на влијанијата од климатските промени, локални планови за поплави и други природни катастрофи, заштита на животната средина и слично.

Денес активностите, целите и очекувањата од проектот беа презентирани пред претставници на локалната самоуправа од различни сектори, јавните претпријатија и граѓански организации.

„Овој проект се осврнува на прашањата врзани со климатските промени, што општините преземаат, имаат ли дата база што воопшто се случува на тој план. Ќе имаме добри практики од Италија, да создадеме неколку плански стратешки документи, кои ќе понудат решенија за справување со поплави и разни други климатски промени.“, рече Дашмир Османи од општинскиот Сектор за развој.

Во следниот период ќе се спроведуваат повеќе активности и ќе се прибираат потребните податоци за креирање на стратегиите.

„Најбитно е тоа што со овој проект ќе добиеме важни податоци кои до сега недостасуваат . Документите ќе понудат природни решенија за зачувување на животната средина.“, рече Арон Ферати, надворешен експерт за животна средина.

Вкупната финансиска рамка на проектот е 1,2 милиони евра, додека грантот кој Општина Гостивар го добива е 83.000 евра. Активностите ќе траат до декември 2026-та година.