Општина Гостивар започна со санирање на ударните дупки по главните градски улици

Локалната самоуправа деновиве започна со крпење на ударните дупки на главните градски сообраќајници. Најпрво се интервенира на улица „Илинденска“ и дел од “Живко Брајкоски”, а потоа ќе се продолжи и на други улици каде што е неопходно.

„Од увидот на терен констатиравме дека од главните градски улици, улицата „Илинденска“ од кај поранешен Жито Шар до излезот од градот, како и на кракот до железничкиот премин, асфалтот е многу оштетен и има многу ударни дупки, така што започнавме со работите токму во овие делови. По санација на овие улици, ќе продолжиме и на другите градски улици каде што ќе оцениме дека интервенцијата е неопходна “, вели Бесим Догани, одговорен во Канцеларијата за локален економски развој и имплементација на проекти при Општина Гостивар.

Од ЛЕР канцеларијата информираат дека во тек се градежните работи за асфалтирање на улица во населбата Карагач, во должина од 365 метри и широчина од 5 метри и дека во периодот што следува, ќе се реализираат и други инфраструктурни проекти во рамките на Развојната програма на Општина Гостивар за 2019 година, чија реализација беше во застој, поради неможноста на отворање тендери во изборен период.