Општините од утре можат да аплицираат за грантови за развој на социјални услуги на локално ниво

Заменик министерот и државниот секретар на Министерството за социјална политика, Ѓоко Велковски и Фатмир Сабриу, денеска го презентираа третиот јавен повик за грантови за развој на социјални услуги, поддржан од Светската банка. Повикот е дел од Проектот за подобрување на социјалните услуги и вклучува услуги во домот и заедницата.

Целта е проширување на опфатот од 41 на најмалку уште 20, над 60 општини. Велковски ги повика општините да аплицираат и ја потенцираше важноста на инклузивното општество, новите софтверски решенија за интеграција на социјалната заштита и поддршката за вработените во социјалните центри.

Сабриу нагласи дека проектот обезбедува пристап до подобри услуги за најранливите, додека истовремено создава нови работни места, со што придонесува за економскиот развој.

Денешната презентација овозможи детален преглед на условите за аплицирање, како и информации за поддршката која ќе им биде на располагање на општините и давателите на социјални услуги.

Проектите ќе се реализираат во периодот од 2025 до 2026 година, со цел подобрување на услугите и пристапот за ранливите групи. Министерството ќе им помогне на општините во подготовката на потребните документи.