Општински натпревари по прва помош во Гостивар, учениците покажуваат знаења, вештини и хуманост

Во Гостивар денес се одржуваат Општинските натпревари по прва помош, традиционален настан на кој учениците ги мерат знаењата и вештините по пружање прва помош. Учествуваат 14 екипи од кои 7 од средните училишта од општините Гостивар и Маврово и Ростуше и 7 од основните училишта од гостиварската општина. Натпреварот е во организација на ОО Црвен крст Гостивар и беше свечено отворен утрово.

„Често, во секојдневниот живот, можеме да се соочиме со итни ситуации: рани, изгореници, губење на свест или несреќи. Во тие моменти, првата помош е првиот и најважен чекор што можеме да го преземеме за да му помогнеме на некого кој е во опасност, пред да пристигне медицинска помош. Првата помош не бара сите да бидеме лекари, но бара да бидеме подготвени, смирени и да ги знаеме основните чекори. Тоа вклучува запирање на крвавење, смирување на повреденото лице, згрижување на изгореници, убоди и повици до надлежните служби за помош. Овие првични постапки можат да бидат пресудни за спасување живот. Важно е да нагласиме дека првата помош не е само знаење — таа е и граѓанска одговорност. Таа нè прави посвесни, похумани и подготвени да дејствуваме во најтешките моменти. Црвениот крст на Република Северна Македонија е лидер во едукацијата за прва помош. Има долгогодишно искуство и традиција во областа на едукација на населението за правилно и навремено пружање прва помош.“, истакна претседателот на гостиварскиот Црвен крст, Бесник Зеќири.

Општина Гостивар е еден од покровителите на натпреварувањето. На отворањето се обрати и градоначалникот Ваљбон Лимани.

„Многу ми е мило што гледам толку голем број во оваа активност. Иако станува збор за натпревар, сакам да ви напоменам дека пред сè е важно да учествувате, да бидете дел од натпреварот и да бидете подготвени да се справите со сите предизвици што може да се појават во вашиот живот. Ви посакувам успешен натпревар — нека победат најдобрите! Се надевам дека ќе продолжиме со вакви активности и во иднина.“, рече градоначалникот.

Пред учениците беше истакнато дека натпреварите се можност да се покаже подготвеноста да се биде солидарен и да се помогне при итни ситуации.

„Брзата и смирена реакција со прва помош може да биде пресудна за здравјето и безбедноста на ученик, наставник или било кој друг во училиштето. Ова не е само натпревар на вештини и знаење, туку и можност да се покаже колку сме подготвени да си помогнеме еден на друг во итни ситуации. Преку овие натпревари, вие не учите само како да реагирате при несреќи, туку и како да покажете одговорност, соработка и хуманост.“, кажа секретарката на Црвениот крст, Мерита Алили.

По општинските следуваат регионални натпревари кои ќе се одржат на 10 мај во Гевгелија, додека Гостивар оваа година ќе биде домаќин на Републичките натпревари по прва помош планирани за 20 септември.