Основното училиште „Гоце Делчев“ во Гостивар го прослави патрониот празник

Традиционално, со положување на цвеќе на бистата на великанот Гоце Делчев и културно-уметничка програма, основното училиште во Гостивар што го носи името на овој македонски револуционер го прослави патрониот празник, 4 мај.

„Гоце Делчев е револуционер на балкански размери, нему му е туѓ секаков национализам и шовинизам. Тој мечтае за балканска федеративна република, како највисок дострел на збратимувањето на балканските народи. Гоце високо го издигнува неговиот интернационален и космополитски поглед. „Јас го разбирам светот единствено како поле за културен натпревар меѓу народите“ – оваа мисла го вбројува Гоце во редот на светските хуманисти. Оваа порака до денес не изгубила од својата актуелност. Гоце е најпрепознатливата фигура на македонската револуционерна организација кој со својот авторитет успеал да ја прошири мрежата на организацијата и до најмалите места во Македонија“, беше истакнато на свеченоста.

Културно-уметничкиот дел од прославата беше исполнет со реферат и рецитации посветени на ликот и делото на Гоце Делчев, како и со музички изведби на талентирани ученици и традиционални ора и песни.

Со оглед дека денеска е 5 мај-Ден на македонскиот јазик, беше искористена прилика да се направи и потсетување за вредноста на македонскиот јазик и писмо.

Во основното училиште „Гоце Делчев“ во Гостивар настава следат над 1.140 ученици во паралелки на македонски и на албански наставен јазик.