Остатоците од курбаните да се фрлаат на Русино, апел од Комуналец-Муслиманите во подготовка за утрешниот празник

Во пресрет на муслиманскиот празник Курбан Бајрам, гостиварското комунално претпријатие испрати апел до граѓаните да се одржува хигиена при колење на бајрамските курбани и остатоците да не се фрлаат во контејнери. Од претпријатието информираа дека  во соработка со општината, Муфтиството и претпријатието „Русино“ определиле посебно место за таа намена на депонијата Русино.

„Ги известуваме граѓаните дека на „Русино“ можат да депонираат органски отпад, за што е отворена посебна јама и за  физичките лица ќе биде бесплатно. Апелираме да не го фрлаат во контејнерите за да се избегне ширење на лоша миризба и загрозување на здравјето“, извести Комуналец.

Граѓаните од муслиманска вероисповед ги прават последните подготовки за утрешното празнување на Курбан Бајрам. Обичај е на овој празник да се принесува животно како жртва, за доброто на верата и за корист на луѓето. Принесувањето курбан е ритуал што се поврзува со Ибрахим (Авраам) и Исмаил и значи приближување кон Бога. Според Куранот, светата книга на муслиманите, оваа жртва ја заменува човечката која требало да ја направи Ибрахим наместо да го жртвува сопствениот син. Но, Алах тоа го заменил со овен.