Осуда за нападот врз колегите и силна порака на новинарите и снимателите од Гостивар

Новинарите и снимателите од Гостивар од повеќе локални и регионални медиуми попладнево се собраа на  градскиот плоштад за да испратат порака со осуда за синоќешниот напад врз колегите на протестите во Скопје.

– Во име на гостиварските новинари, присутни на собиров, но и нa оние кои поради објективни причини не се тука, а нé поддржуваат, изразуваме жалење за тоа што се случи вчеравечер,  а воедно остро го осудуваме насилството извршено против двајца наши колеги од веб порталот A1on.

Иако, сме информирани дека лицата кои го извршиле насилството врз новинарот и снимателот, се веќе приведени, сепак, знаејќи како обично завршуваат процесите кога овие луѓе ќе седнат на обвинителната клупа и често не им се изречува никаква казна, бараме овој пат истражните и судските органи, да ја извршат својата должност достоинствено и на насилниците да им ја изречат заслужената казна.

Апелираме, исто така, секој поединец или група, особено политичарите, да бидат внимателни и воздржани во својот речник и обраќања, особено во овој чувствителен период,во кој не вовлекоа токму луѓето од политиката. Да се запре со говор на омраза и да не се поттикнуваат тензии.

Новинарите имаат мисија да известуваат за секој настан, без разлика каков е тој и имаат обврска објективно да ја информираат јавноста. Ние новинарите постоиме за тоа.

Воедно, очекуваме сите наши колеги, без оглед во кои медиуми работат, и без оглед на тоа во какви асоцијации или здруженија се групирани, обединети да го кренат гласот на разумот против насилството и говорот на омраза.

И на крај,  им даваме до знаење на сите, дека насилството врз нас, заканите или заплашувањата нема да не спречат. Напротив, ќе не зајакнат уште повеќе и ќе содејствуваме и соработуваме повеќе од било кога, се вели во пораката.

-Лично сметам дека пораката што ја испраќаме е многу силна баш поради мултиетничкиот дух на Гостивар, почитта и соработката што како колеги ја имаме овде, секојдневно, без оглед на нашата национална и верска припадност, без оглед на нашите политички гледишта и убедувања, рече Љупка Антеска, новинар во Тв Кисс и уредник на Гостиварпрес.

Пораката на гостиварските новинари беше прочитана на македонски и на албански јазик.

Реакции за нападот врз новинарот и снимателот стигнаа речиси од сите релевантни организации и здруженија: Советот за етика во медиумите, Самостојниот синдикат на новинарите, Здружението на новинари, Агенцијата за аудио и аудиовизуелни медиумски услуги. Осуда испратија и политичките партии како и организаторите на протестот.