Осум децении од победата над фашизмот: Русија утре слави, Европа денес

На денешен ден пред осум децении, со капитулацијата на нацистичка Германија, беше означен крајот на Втората светска војна во Европа. Денес, 8 мај, во повеќе европски држави се одбележува Денот на победата во Европа (VE Day), додека Русија утре, на 9 мај, ќе ја одбележи 80-годишнината од победата над фашизмот со традиционална воена парада во Москва.

Овој ден се смета за еден од најзначајните државни празници во Русија, со длабока историска и симболична вредност. Советскиот Сојуз поднесе огромни жртви во борбата против нацистичка Германија, и поради тоа Денот на победата има особено место во колективната меморија на народот.

Иако првично капитулацијата беше потпишана на 7 мај во Ремс, Франција, Советскиот Сојуз инсистираше на ново потпишување во Берлин, на 8 мај навечер, што по московско време веќе беше 9 мај. Така, Западот го одбележува 8 мај, додека Русија и нејзините сојузници – 9 мај.

Во Русија, воената парада на Црвениот плоштад останува централен настан. Освен воените единици, на парадата учествуваат и ветерани, официјални лица и странски делегации. Годинава, парадата се одвива во сенка на зголемени тензии и засилени безбедносни мерки, откако се појавија извештаи за украински саботажи и кибер напади насочени кон воената инфраструктура.

Истовремено, Европа се фокусира на сеќавањето и почитта кон жртвите. Во Лондон и други главни градови ќе се одржат комеморации, со минута молк и пригодни церемонии.