Освежување со течности и совети против жештините за гостиварци

Македонија деновиве е погодена од топлотен бран со многу високи температури и јако УВ зрачење. Екстремните горештини носат низа ризици за здравјето на луѓето, особено за ризичните категории како постари лица, хронично болни, трудници и слично.

Ова беше повод здружението на граѓани „When in Trouble“ од Гостивар да организира превентивна активност во централното градско подрачје, да ги потсети граѓаните на начините на заштита при топлотни бранови и да им подели вода и сок како освежување.

„На минувачите им делиме летоци со совети за претпазливост при овие високи температури, да пијат доволно течности, да носат светла облека, да не излегуваат  надвор без потреба и да избегнуваат напорни физички активности во најтоплиот период од денот, да јадат полесна храна итн. Исто така им делиме вода и сок за да се освежат барем малку на жешкото време“, кажа Билјана Беловинова, претседателка на здружението.

Според прогнозите на метеоролозите времето ќе биде многу топло и во следните денови, со максимални температури во поголемиот дел од земјава над 35, а наместа и над 40 степени, поради што ќе биде активно портокалово ниво на опасност од високи температури.