Отворен е тендерот – ОУ „Гоце Делчев“ во Гостивар ќе добие нов зелен кров

Уште еден септември, учениците во основното училиште „Гоце Делчев“ во Гостивар го дочекуваат со руиниран покрив. Сепак, оваа нова учебна година оправдано носи оптимистички изгледи, дека ова ќе биде последен септември во вакви услови. Им се гледа крајот на долгогодишните маки на децата кои следат настава во ова училиште, и на наставниците кои работниот век го поминуваат тука.

Новиот кров ќе се гради со заеднички проект на Општина Гостивар и УНДП. Тендерите за изведувач на работите, како и за фирма која ќе врши надзор се во тек.

„Ова е приоритет над приоритетите. Ветивме дека ќе го решиме и го решаваме. Од вкупната сума 300 илјади евра, ние како општина обезбедивме 100 илјади, додека 200.000 ги обезбеди  УНДП. До крајот на октомври ОУ „Гоце Делчев“ ќе има зелен кров, како ниедно училиште во земјава. Тоа ќе послужи најверојатно и како лабораторија за одржување на часови по биологија или како ботаничка градина. Тендерите и за изведувач и за надзор се веќе објавени.“, изјави градоначалникот Арбен Таравари.

Покривот на училиштето „Гоце Делчев“ е рак рана на гостиварското образование, за кое не е изнајдено решение со децении наназад. Кога врне дожд или при снег, дотраениот кров прокапува и  училниците на горниот кат од објектот се полнат со вода.