Отворен конкурс за стипендирање на ученици Роми

Министерството за образование и наука го објави конкурсот за доделување на стипендии за средношколци Роми, за учебната 2018/2019 година. Планирани се вкупно 880 стипендии во пет категории за ученици Роми запишани во прва, втора, трета и четврта година од јавните и приватните средни училишта во Република Македонија.

Во првата категорија се доделуваат вкупно 200 стипендии за средношколци Роми од 2.200 денари месечно за постигнат успех од 4.50 до 5.00 во последната учебна година. Во втората категорија се доделуваат 320 стипендии од 1.500 денари месечно за постигнат успех од 3.50 до 4.49, во последната учебна година. Во третата категорија се доделуваат 160 стипендии од 1.000 денари месечно по ученик за постигнат успех од 3.00 – 3.49 во последната учебна година, додека во четвртата 50 стипендии од 1.000,00 денари месечно за ученици со посебни образовни потреби кои имаат постигнат успех од најмалку 3.00 во последната учебна година.
Во петта категорија се доделуваат 150 стипендии од 600,00 денари месечно по ученик за постигнат успех од 2.00 – 2.99 во последната учебна година.

Пријавувањето трае до 12 декември. Детали за условите во конкурсот може да се најдат на веб страната на МОН.