Отворен нов кабинет во техничкото училиште во Гостивар: Современа настава и пракса, па и вработување!

Дваесетина ученици добија можност да стекнат стручно образование за електричар-електромонтер, по светски стандарди во средното техничко училиште во Гостивар. Во училиштето денес беше пуштен во употребан новиот кабинет за оваа струка, којшто е опремен со поддршка на компанијата ЕВН. Во соработка со истата компанија ќе се одвива и наставната програма и практичниот дел од наставата, а учениците, по завршување на образованието ќе добијат понуди за работа.

На свеченото отворање присуствуваше министерот за образование Арбр Адеми.

„Оваа паралелка е посебна од повеќе причини. Младите добиваат современи услови и можности за  образување, предвидени се и стипендии, а за најдобрите и понуди за вработување по завршување на школувањето. Апелирам до сите ученици да ги следат насоките и советите од професорите и менторите, затоа што само така ќе стигнат до успех. Нашите напрои и цел се во насока да ги оспособиме за пазарот на трудот“, изјави министерот.

Претседателот на Управниот одбор на ЕВН Штефан Петер, истакна дека е горд на учениците коишто избрале да се вклучат во оваа паралелка и дека компанијата ќе им ја пружи сета потребна поддршка. „Мило ми е што сум овде во Гостивар на овој свечен ден. Горд сум на учениците коишто сфатија дека треба да ја земат иднината во свои раце и одлучија да ни веруваат. Затоа се обврзуваме да им пружиме образование на светско ниво, а потоа и можност за вработување. Иднината на младите е наша обврска, која можеме да ја обезбедиме само ако им дадеме квалитетно образование и можност да работат.“, рече Петер.

Директорот на техничкото училиште во Гостивар, Ибраим Асани во своето обраќање, се заблагодари на поддршката за отворање на кабинетот и истакна дека овој проект е од големо значење за децата и за самото училиште.

„Ваквата соработка меѓу училиштето, Министерството и компанијата е многу значајна за нас и нашите ученици. Нашите генерации ќе имаат можност да се вклучат во работниот процес без проблеми“, изјави Асани.

Новиот кабинет е опремен со современи уреди, заштитна опрема и алатки кои монтерите ги користат при секојдневна работа на терен. Средношколците, пракса ќе посетуваат во подружниците на ЕВН во Гостивар и во Тетово, под менторство на стручни монтери и специјалисти. Проектот е вреден околу 20 илјади евра.