Отворена Летната школа во Гостивар, вклучени се над 740 деца

На пригодна свеченост во спортската сала „Младост“ во Гостивар, во присуство на ученици, наставници, родители и други гости, денес беше означен почетокот на Летната школа. Во рамки на школата бесплатно ќе се спроведуваат најразлични активности наменети за деца од 7 до 14 години како: спортување, шах, изучување странски јазици, уметничка креативност и др.

Проектот го организира Општина Гостивар, во соработка со основните училишта, а во него се вклучени над 740 основци.

„Пред 5-6 месеци добив предлог од наш граѓанин да организираме една ваква Летна школа. Реков, не знам колку ќе има заинтересираност, затоа што децата едвај чекаат да заврши учебната година. Меѓутоа го разгледавме предлогот и решивме да го спроведеме. Сега кога гледам колку интерес има, навистина сум презадоволен и многу ми е мило. Се надевам дека ќе имаме многу убави моменти и дружење во текот на овие активности“, рече на отворањето, градоначалникот Арбен Таравари.

Со децата ќе работат околу 40 инструктори, наставници, стручни лица, секој во својата област.

Ова е прва Летна школа од ваков вид во Гостивар, а локалната самоуправа нагласи дека ќе се залага да стане традиција.

Атмосферата на денешното свечено отворање беше разубавена со музички настапи.