Отворена нова фитнес зона во Гостивар

Во гостиварската населба Дутлок, кај големиот мост денес беше предадена во употреба фитнес зона за спортување и рекреација на граѓаните. Инвестицијата е на Агенцијата за млади и спорт во висина од околу 35 илјади евра.

„Во Гостивар планирани се повеќе спортски објекти, како терени за тенис и за мали спортови, базен и други. Фитнес зоната е само почеток на инвестициите за развој на спортот и физичката култура“, рече заменик директорот на Агенцијата за млади и спорт, Газменд Ристеми.

Градоначалникот Арбен Таравари потенцираше дека ова е прва инвестиција на државата во Гостивар, откако тој седна на раководната фотелја во општината. „За девет месеци, овие 35 илјади евра се првите пари кои држвата ги дава за Гостивар. Се надевам дека во иднина ќе има повеќе проекти, затоа што гостиварци плаќаат даноци како и граѓаните од другите општини и Гостивар не е град на една политичка партија, туку на граѓаните“, изјави Таравари.

Освен стандардните справи за вежбање, новата фитнес зона има и справа за лица со посебни потреби.

Лани во август беше отворена фитнес зона во паркот близу летниот амфитеатар.