Отворено спортско-рекреативно катче во гостиварскиот парк

Граѓаните на Гостивар добија ново место за спортски активности и рекреација. Во големиот градски парк, спроти Основниот суд беше отворена „Coca-Cola активна зона“, проект на компанијата Coca-Cola и Пивара Скопје, кој го промовира активниот начин на живот. Црвената лента, која симболично го означи пуштањето во употреба на катчето ја пресекоа Ламбро Патче, директор за комуникации во Пивара, градоначалникот Невзат Бејта и гостиварскиот фудбалер и спортски работник Арѓент Беќири.

„Наша цел е да ги поттикнеме на физичка активност сите жители на општина Гостивар, без разлика на нивната возраст, пол или физичка предиспозиција. Зоната ја поставуваме на достапна локација, каде во следниот период во соработка со стручни спортски лица ќе организираме низа спортски настани, со намера „Coca-Cola активната зона“, во Гостивар да прерасне во место за инклузија на сите граѓани кои ќе може непречено да го реализираат својот потенцијал, да се забавуваат и социјализираат“, рече Патче.

Катчето се реализира во соработка со локалната самоуправа.

„Едно вакво спортско-рекреативно катче е навистина добредојдено во градот Гостивар. Граѓаните сега ќе имаат шанса бесплатно да практикуваат спорт и да се рекреираат, а оние поупорните – да вежбаат и професионално“, изјави Бејта.

Фудбалерот Беќири во кусото обраќање порача дека граѓаните треба да ја чуваат оваа зона, да се грижат за неа и да ја чувствуваат како своја. „Оваа прилика сакам да ја искористам да упатам апел посебно до младата популација повеќе и поактивно да се занимава со спорт“, потенцираше Беќири.

Активната зона има шест современи професионални фитнес справи кои им се достапни на граѓаните бесплатно, 24 часа во денот.