Овозможена електронска проверка на предметите за приватизација на градежно земјиште

Пуштена е во функција електронска платформа, privatizacija.finance.gov.mk преку која граѓаните и фирмите можат да се информираат до каде е нивниот предмет за приватизација во Управата за имотно правни работи. Од Министерството за финансии велат дека на овој начин граѓаните и фирмите добиваат нова и подобра услуга од Управата, се подобрува ефикасноста на Управата и се изврши дигитализација на процесите.

„Постапката за користење е многу едноставна. Се што ви треба од податоци се архивскиот број на предметот, кога е поднесен, катастарската парцела и општина каде е поднесен. Доколку не ја знаете катастарската парцела или општината, доволно е само да го внесете својот матичен број или даночен број во случај на правно лице. Софтверот потоа на вашиот е-маил доставува податоци до каде е вашиот предмет“, изјави на презентацијата на платформата, министерот за финансии Драган  Тевдовски и посочи дека засега на платформата се внесени предметите од 2018 и 2019 година, додека во рок од една година ќе се внесат и сите предмети.

Според директорката на Управата, Шасине Касами платформата е само еден од чекорите кои институцијата ги презема во насока да биде ефикасна, модерна и ориентирана кон граѓаните и фирмите.

„Порталот за проверка на статус на предмети за приватизација е направен во рамки МИС системот, изработен во 2013 година со поддршка на проект од Светска банка. Иако и тогаш постоела опција да се направи ваква платформа, таа можност не била искористена. Ние ја искористивме оваа можност за да им понудиме подобра услуга на граѓаните. Наша цел е да бидеме ефикасна Управа, која ќе им служи на граѓаните и фирмите и ќе понуди квалитетна услуга“, рече Касами и посочи дека се работи на решавање на поднесените предмети за приватизација и дека од 310.000 поднесени, останати се околу 90.000 предмети за решавање.