Пад на еврото во однос на доларот и франкот

На светските пазари вредноста на доларот во однос на останатите валути силно порасна минатата недела бидејќи американската ФЕД повторно агресивно ги зголеми каматните стапки, па со тоа курсот на еврото падна на најниско ниво во последните 20 години, далеку под еден долар.

Индексот на доларот, кој го покажува движењето на американскиот долар во однос на другите светски валути, минатата недела порасна за 3 отсто на 112,96 поени, а во еден момент, за прв пат по 20 години, се проби над нивото од 113 поени.

Растот на доларот втора недела по ред е благодарение на дополнителното зголемување на каматните стапки од страна на американската централна банка.

Ваквото брзо зголемување на каматните стапки, кое започна во март годинава, претставува најагресивно зголемување на цената на парите од 1990 година, кога ФЕД почна да ја користи каматата на заемите преку ноќ како основна алатка на монетарната политика.

Еврото тоне и во однос со франкот. Швајцарскиот франк оваа недела во однос на еврото го достигна највисокото ниво од јануари 2015 година.

До четвртокот швајцарската централна банка беше последна во Европа која имаше негативна каматна стапка, но и тоа се промени. Од јуни, швајцарските монетарни власти (за прв пат по 15 години) почнаа да ја заоструваат монетарната политика, откако основната каматна стапка беше фиксирана на минус 0,75 отсто од 2015 година.

Слична е ситуацијата и со Британската валута, фунтата минатата недела потона за 3% на 1,0840 долари и е на најниско ниво во изминативе 37 години.