Пајак службата собра куп автомобили во централното подрачје на Гостивар

Активностите за поголем ред и безбедност со паркирањето во Гостивар, кои заеднички ги спроведуваат полицијата и пајак службата на Јавното претпријатие за паркинзи, продолжуваат и во овој период. Во однос на неправилното паркирање, неколку улици во поширокото централно подрачје се нотираат како најоптоварени, и тоа: ул. „Мајор Чеде Филипоски“ кон општата болница, ул „Живко Брајковски“ од судот кон населбата Дутлок, тесното грло на бул. „Браќа Ѓиноски“ итн.

Според податоците од СВР, во вчершната акција на пајак службата во Гостивар биле подигнати 13 погрешно паркирани возила, најмногу во централното подрачје на градот. За сопствениците на возилата изготвени се соодветни пријави. Освен казната за сообраќајниот прекршок, тие мора да платат и надоместок од 1.600 денари за да си го земат возилото од плацот на ЈП.

Паралелно со контролата во паркирањето, службите ги санкционираат и оние кои узурпираат јавни површини со земјоделски и други прехранбени производи со импровизирани тезги, со угостителска опрема и слично.

Целта на акциите е да се воспостават безбедносни услови и непречено движење за пешаците, како и за останатите учесници во сообраќајот.