Пакети за загрозени семејства и ваучери за мали бизниси во Гостивар, Кичево и Дебар

Семејства од маргинализирани заедници и локални мали и средни бизниси ќе добијат помош преку проект кој започнува да се спроведува во Гостивар, Кичево и Дебар.

Проектот е насловен „Борба против ширењето и ублажување на најсериозните негативни последици од пандемијата Ковид-19 кај маргинализираните заедници на западен Балкан”. Го координира организацијата Care од Косово, додека во Македонија го реализира невладината Месечина од Гостивар.

Предвидено е да бидат дистрибуирани 250 хигиенски пакети и по 45 прехранбени и медицински пакети. Бизнисите ќе се помогнат со ваучери.

„Ќе бидат опфатени 15 локални фирми кои се бават со мал и среден бизнис, ќе се обидеме преку овој пакет на помош да им се помогне во набавка на репроматеријал кој им е потребен за да може да го издржат товарот кој им го нанесува пандемијата. Еден ваучер ќе изнесува 500 евра“, изјави Мухамед Точи, претседател на „Месечина“

За распределување на помошта ќе бидат ангажирани педесетина волонтери. Според планираното, сите активности треба да се заокружат за околу три месеци.

Денес во општина Гостивар се одржа работен состанок со вклучените организации со цел координација за што поефикасно спроведување на сето она што е предвидено.

Проектот е финансиран од Германското сојузно министерство за надворешни работи. Вкупната финансиска рамка изнесува 40 илјади евра.