Пандемијата ги намали приходите во општинскиот буџет на Гостивар

Коронакризата ги намали приходите во општинскиот буџет на Гостивар. Реализацијата на буџетот во првата половина од годината е околу 45%, што според одговорните за финансии во локалната самоуправа е задоволително ниво. Сепак, пандемијата резултира со пониска наплата на даноците и таксите, а недоаѓањето на печалбарите е удар плус врз јавните пари.

„Постојано правиме анализи и ја разгледуваме состојбата. Факт е дека пандемијата влијае негативно, граѓаните се финансиски погодени и помалку ги подмируваат обврските. Исто така печалбарите не дојдоа, општината во летните месеци обично има најголем износ на наплата на такси и даноци, а годинава имаме намалување во тој поглед.“, рече Садри Елези, раководител на Секторот за финансии

Најголем процент на реализација на буџетот во првите шест месеци има кај дотациите од државата и кредитите.

„Од 1 милијарда 112 милиони денари планирани, реализирани над 500 милиони. Основниот буџет има реализација од околу 42%, самофинансирањето 45%, дотациите се со најголем процент на реализација затоа што тоа се пари кои дирекно доаѓаат од државниот буџет, кредитите се со над 82%.“, рече Елези.

Се очекува негативните економски ефекти од коронакризата да се чувствуваат уште долго. Полнењето на општинскиот буџет во делот на самофинансирањето, ќе зависи од  финансиската моќ на граѓаните и инвеститорите. Ако се наплатат побарувањата, општината ќе има и плус пари за планирање на капитални инвестиции, оценуваат од секторт за финансии.

Кварталниот извештај за буџетот на Општина Гостивар ќе се најде на дневен ред на седницата на Советот, што ќе се одржи следната недела.