Парада на победата во Москва – Путин: Русија донесе мир и слобода на светот

На Црвениот плоштад во Москва денеска беше одржана голема воена парада по повод 80-годишнината од победата над фашизмот во Втората светска војна. На свеченоста присуствуваа повеќе од 20 светски лидери, голем број делегации од различни држави и илјадници граѓани, кои со почит ги ислушаа говорите и сведочеа на историскиот спектакл.

Во централниот говор, претседателот на Руската Федерација, Владимир Путин, истакна дека Денот на победата е „најголемиот празник“ за Русија и изрази благодарност кон ветеранските поколенија. „Како наследници на победниците, ние го чувствуваме 9 мај како ден на единство, традиција и национална гордост. Русија ќе остане непремостива пречка за фашизмот и антисемитизмот, а подвизите на борците од Црвената армија ќе останат забележани во светската историја. Русија донесе мир и слобода на светот“, порача тој и прогласи минут молк за сите загинати во конфликтот.

Парадата ја отвори марш низ плоштадот на пешадиските и механизираните единици, по што беше извршена презентација на повеќе од 130 модерни воени возила. Меѓу нив се најдоа најновите руски тенкови на платформа „Армата“, системи за противвоздушна одбрана С-400, повеќецевни ракетни лансери „Торнадо-С” и ракети „Искандер“. Мобилните ракетни системи Јарс, специјализираните воени камиони „Камаз“ со борбени дронови „Геран“ и „Ланцет“, како и најсовремените лесно оклопни возила, дополнително ја одбележаа технолошката моќ на руските вооружени сили.

Меѓу бројните гости беа претседателите на Кина Си Ѓинпинг, на Бразил Луис Инасио Лула да Силва, на Венецуела Николас Мадуро, и на Египет Абдел Фатах ел-Сиси, како и премиерот на Словачка Роберт Фицо, претседателот на Србија Александар Вучиќ и претседателот на Република Српска Милорад Додик.

Нивното присуство Москва го оцени како знак на почит кон жртвите и непроценливиот придонес на Советскиот Сојуз за поразот на нацизмот, над 27 милиони Советски државјани загубија живот во конфликтот.