Парите од МојДДВ за второто тримесечје ќе се исплаќаат во февруари

Управата за јавни приходи соопшти дека исплатата за второто тримесечје од МојДДВ за враќање на дел од ДДВ кај физичките лица, ќе стартува во февруари 2020 година. Второто тримесечје ги опфаќа октомври, ноември и декември 2019-та. Во тој период, заклучно со 30 декември скенирани биле 28.948.878 фискални сметки, со остварен промет од 14.301.474.854 денари, вкупен ДДВ – 1.554.510.671 денари, а повратот од 15% е во износ од 233.176.601 денари или 3.791.000 евра.

Притоа, од УЈП информираат дека за првото тримесечје од МојДДВ, за коешто исплатата започна во декември 2019 година, исплатен е поврат  кај 144.601 граѓани кои во апликацијата МојДДВ внеле валидни трансакциски сметки, во износ од 155.244.780.00 денари.

За граѓаните кои во апликацијата МојДДВ внеле погрешна трансакциска сметка и направиле корекција, информираат дека исплатата ќе се случи во понатамошниот период. Воедно, апелираат корисниците кои не внеле трансакциска сметка, тоа да го направат, по што ќе следува исплатата на повратот.