Паркирајте по пропис – пајакот “демне” по гостиварските улици

Пајак службата во Гостивар дневно подигнува од 5 до 10 погрешно паркирани возила. Надлежните оценуваат дека засилените контроли ја подигнаа дисциплината кај возачите, и тие сега обрнуваат повеќе внимание на тоа каде ги оставаат своите автомобили. Непрописното паркирање се уште го има, но постепено се воведува ред.

Од јавното претпријатие за паркинзи и зеленило, во чиј склоп функционира пајак службата велат дека акциите ќе бидат редовни и понатаму.

„Може да кажеме дека акциите даваат резултати, но секако дека треба и понатаму да се работи во правец на воведување ред. Ние ќе продолжиме да спроведуваме контроли, секојдневно на терен заедно со полицијата со која имаме одлична соработка и гледаме дека има волја да се стави ред по улиците.“, рече Беким Челебиу, директор на ЈП за паркинзи и зеленило.

Кога почна акцијата во првата недела беа подигнати околу 80 погрешно паркирани возила. Биле оставани на тротоари, зелени површини, на крстосници и слично.

Неколку улици и делови од градот се нотираат како најоптоварени со непрописно паркирани автомобили: ул. „Мајор Чеде Филипоски“ кон општата болница, ул „Живко Брајковски“ од судот кон населбата Дутлок итн.

Паралелно со контролата во паркирањето, службите ги санкционираат и оние кои узурпираат јавни површини со земјоделски и други прехранбени производи со импровизирани тезги, со угостителска опрема и слично.

Целта на акциите е да се воспостават безбедносни услови и непречено движење за пешаците, како и за останатите учесници во сообраќајот.