Патиштата проодни, но неопходна е внимателност!

Од утрово во поширокиот гостиварски регион има нови снежни врнежи. Врнежите се со послаб интензитет и засега не предизвикуваат поголеми проблеми во одвивањето на сообраќајот. Сепак, на патиштата владеат зимски услови, по коловозите има остатоци од снег и потребна е внимателност и почитување на сообраќајните правила и прописи.

Според информациите од Автомото Сојузот на Македонија, прекини во сообраќајот и забрани во западниот дел на земјава нема. Од таму предупредуваат на можни помали одрони на патните правци Гостивар-Стража и Маврово-Дебар.

Што се однесува до временските прилики, денес генерално ќе владее облачно време со слаб до умерен северен ветер. Минималните температури се спуштија до -15 степени, а дневните се очекува да се движат од -1 до -4 степени.