Патролни општински екипи во Гостивар контролираат дали граѓаните носат маски

Стандардно, со повик граѓаните да се држат до мерките за заштита од коронавирус и оценка дека состојбата е релативно стабилна заврши и денешниот состанок на Меѓуопштинскиот кризен штаб во Гостивар.

Како што веќе информиравме, изминатото деноноќие на подрачјето е потврден само еден новозаболен и тоа од село во Општина Врапчиште.

Носењето заштитна опрема на лицето е една од мерките на којашто надлежните постајано им укажуваат на граѓаните. Во Гостивар деновиве, освен полицијата и општински патролни екипи контролираат дали и колку се користат маски во пропишаните услови и  места.

„Сега веќе функционираат мобилните екипи на Општина Гостивар кои имаат за задача да контролираат дали граѓаните ги почитуваат препораките и протоколите. На одредени граѓани кои не носеле маски веќе им е сугерирано, биле предупредени, но ако има такви кои ќе продолжат со непочитување, најверојатно ќе почнеме и со казнување.“, рече градоначалникот Арбен Таравари.

Според информациите од Кризниот штаб, сите пациенти со Ковид 19 на подрачјето во моментов се во стабилна состојба, надвор од загрозувачки ризици, а голем дел од нив се и без никакви симптоми.