Павле од Гостивар во македонскиот тим на Светското првенство во гејминг

Македонската Е-Спорт Федерација е учесник на Светско првенство во гејмање кое се одржува во Елјат, Израел, на кое учествуваат 40 држави и ќе се натпреваруваат во 5 различни игри: CS:GO, eFootball 2022, Tekken 7, Dota2 и Audition. Претставниците на Македонија учествуваат во две игри CS:GO и eFootball 2022.

Во нашата шестчлена Е-спорт селекција во Израел се наоѓа и гостиварецот Павле “stYleEeZ” Стојановски, кој заедно со Јане “aidKiT” Апостолоски, Дамјан “kyxsan” Стоилковски, Александар “CacaNito” Ќулукоски и Кристијан “fodor” Поповски, ќе се натпреваруваат во CS:GO, a Давид Гаревски ќе се бори да стане најдобриот светски играч во eFootball 2022. 

Првиот меч во CS:GO нашите гејмери го добија со резултат 16:4, совладувајќи ги противниците од Мексико, во вториот загубија од Словачка. Натпреварите од eFootball 2022 се од 17.30 и 18.30 часот.

Им посакуваме среќа и навиваме за Павле и неговиот тим и се надеваме дека ќе се вратат назад со медал од Израел.