Пазарот во Гостивар се отвора во вторник, бесплатно ќе се делат маски на влезот

Состојбата со коронавирусот на поширокото гостиварско подрачје е под контрола, заклучија институциите на денешниот состанок на Кризниот штаб. Олабавувањето на рестриктивните мерки во однос на скратувањето на полицискиот час беше оценето како добар чекор.

Од вторник, следната недела повторно ќе работи големиот градски пзар, кој превентивно беше затворен пред еден месец.

„Пазарот повторно ќе профункционира во вторник. Со сопствениците се договоривме да се преземат неопходните мерки за заштита. За сите продавачи на тезгите ќе се обезбедат заштитни маски, а ќе се внимава и да се создава ред, внатре да нема истовремено голем број на луѓе кои доаѓаат да пазаруваат, да не се создаваат гужви. Исто така, на влезот да се делат бесплатно заштитни маски за купувачите.“, изјави градоначалникот Арбен Таравари.

Градскиот пазар во Гостивар превентивно беше затворен пред еден месец.