Печалбарите носат пари и поголема гужва низ улиците – полицијата апелира на почитување на правилата

Во поширокиот Полошки регион, наскоро ќе се зголеми вкупната динамика, не само по патишта и улиците во Тетово и Гостивар, туку и воопшто, зашто се очекува доаѓање на значителен број времено вработени во странство, кои дел од нивниот одмор ќе го поминат и ќе празнуваат во родните места.

Поради тоа, уште еднаш се потсетуваат сите возачи доследно да ги почитуваат сообраќајните правила и прописи и посебно да внимаваат кога и каде ги паркираат нивните возила, да ја прилагодат брзината според условите на патот и да не седнуваат зад волан под дејство на алкохол.Ова, дотолку повеќе што се најавуваат и снежни врнежи.Со почитување на овие совети и препораки  возачите  најнепосредно ќе придонесат за поголема лична и  вкупна безбедност во сообраќајот.

Со оглед на тоа што следуваат повеќе празници,  Секторот за внатрешни работи Тетово , исто така, апелира до граѓаните да се воздржат од употреба, односно од пукање со огнено оружје, петарди и други пиротехнички средства.Зашто, со тоа најдиректно го нарушуваат јавниот ред и мир, а можат да предизвикаат и несакани појави и настани со мошне негативни безбедносни последици.

На оние кои деновиве и за празниците ќе патуваат кон Попова Шапка и Маврово им се советува задолжително носење на зимска опрема и комплетна проверка на техничката исправност на возилата, за да не им се случат дефекти и потешкотии да стигнат таму каде што планирале.