Педесетина лица каснати од крлежи во гостиварскиот регион

На подрачјето на Гостивар, секоја година се зголемува бројот на граѓани каснати од крлежи, бележат здравствените институции. Овие паразити особено напаѓаат во текот на пролетните и летните месеци, кога луѓето го користат топлото време за престој во природа. Во 2015-та година регистрирани се 100 каснувања, лани имало 130, додека од почетокот на оваа година до сега, 47 случаи. Лекарите велат дека среќна околност е што најголемиот дел од пациентите поминуваат со благи симптоми од локална природа, како црвенило и јадеж на местото на каснување. Болест предизвикана од крлежи на гостиварското подрачје не е регистрирана од 2012-та година. Тогаш во месеците мај и јуни имало по еден случај на Лајмска болест и тоа кај дете на возраст од шест години и маж на 57-годишна возраст.

Во однос на превентивните мерки против каснувања од крлежи, лекарите имаат повеќе препораки кои се однесуваат на внимателност, соодветна облека, специјални препарати и слично.

„При престој во шума, граѓаните треба да се движат по обележани патеки, да избегнуваат пробивање низ високи треви и грмушки. Треба да носат светла облека која ќе ги прекрие отворените делови од телото како раце, нозе, врат и глава. Заштита обезбедуваат и таканаречените репеленти, тоа се хемиски средства со кои се прска облеката или кожата и тие средства ги одбиваат крлежите. Кога ќе се вратат дома, потребно е да направат самопреглед и да ја истресат облеката како проверка за евентуално да не се закачил некој крлеж“, советува Примариус д-р Војислав Огњаноски, епидемиолог во гостиварското одделение на Центарот за јавно здравје.   

Медицинарите, исто така потенцираат дека граѓаните кои ќе забележат дека се каснати од крлеж, не треба да паничат и да се обидуваат сами да го отстранат, туку да побараат стручна помош.