Пеливанството ќе се заштити како културно наследство

Викендов во Студеничани се одржа меѓународна културно-спортска манифестација во традиционално борење – пеливанство. Силите ги измерија пеливани од Македонија, Турција, Грција, Бугарија, Косово и Албанија, кои се натпреваруваа во пет категории.

Министерот за култура Хусни Исмаили изјави дека Министерството ја дава својата поддршка за прогласување на овој етно-спорт за културно добро,  со што ова автентично случување со сите свои специфики, ќе се заштити како културно наследство.

-Тоа е само уште една потврда дека пеливанството е вековна традиција на албанскиот народ што подразбира почитување на моќтта, почитување на противникот, почитување на правилата, на јавноста и достоинствената прослава. Кога на сето ова ќе се додадат обредите пред настапот на борачите-пеливани, тогаш традицијата добива големи вредности кои се восхитувачки за секоја нација. И во иднина треба да се продолжи со грижата за зачувување и негување на традицијата, како богатство кое е од особено значење за генерации кои доаѓаат.“, рече Исмаили.

Во рамки на манифестацијата настап имаа членовите на културно-уметничкото друштво „Емин Дураку“ кои презентираа традиционални ора и игри, а имаше и презентација и дегустација на традиционални јадења.
За вековната традиција пеливанство како традиционален спорт и вештина во општина Студеничани, како своевиден културен артефакт , Институтот за фолклор „Марко Цепенков“ има изготвено елаборат со цел прогласување на пеливанството за културно добро.