Пешаците да преминуваат улица на пешачки, возачите да им даваат предност – апел од полицијата

Секторот за внатрешни работи Тетово апелира до пешаците да ги преминуваат улиците на обележани премини, да ја почитуваат светлосната сигнализација на крстосниците и правилно да се движат таму каде што нема обликувани тротоари.

„На тој начин ќе придонесат за сопствената и безбедноста на другите учесници во сообраќајот, додека во спротивно ќе се соочат со законски предвидените санкции и со парични глоби кои за овој вид сообраќаен прекршок се движат од 20 до 50 евра во денарска противвредност. На родителите на малолетни деца им се советува да водат сметка и да не ги пуштаат децата сами на улица, за да не се изложат на опасност да бидат удрени од некое возило.“, нагласуваат од полицијата

На возачите им се укажува да ја намалат брзината пред прешачките премини и секогаш да им даваат предност, односно да ги пропуштат пешаците.

Недавањето предност на пешаците, според Законот за безбедност на сообраќајот на патиштата се санкционира со изготвување на поднесок и со глоба во износ од 200, односно 250 евра во денарска противвредност.