Македонија

Пештерата Шаркова Дупка во Маврово официјално отворена за посетители

Објавено

пред 1 месец

на

17/12/2021

Од

Gostivarpress.mk

Во снежното Маврово, денес во организација на ЈУНП “Маврово” се одржа завршна конференција за промоција на проектот “Спелео Авантуририте – Голема шанса за Авантуристичкиот туризам”, каде беа презентирани спроведените резултати, со што пештерата Шаркова Дупка во с.Маврово и официјално е отворена за посетители.

Пред присутните поздравен говор одржа директорот на Ј.У.Национален Парк “Маврово” Самир Ајдини, а потоа со свои презентации се обратија координаторите на проектот, претставник на “Маврово 365” и Дарко Неданоски од СФМ.

„Пештерата Шаркова Дупка во с. Маврово, е една од првите туристички уредени пештери во Македонија а нејзните природни особености, вклучително и лесната пристапност овозможуваат добри предуслови за туристичко искористување. Истата за прв пат беше уредена пред 20-тина години кога и повремено работеше за потребите на туристите. Со реализацијата на овој проект се направија неколку значајни измени со што се овозможува повторно ставање во функција на пештерата. Она што е многу битно и дава реална основа дека овој значаен туристички објект ќе профункционира е тоа што од страна на Спелеолошката Федерација на Македонија беше изготвена научна студија во која се вметнати сите потребни информации и анализи како за биодиверзитетот и спелеолошките вредности на пештерата така и за туристичките вредности на истата, но и значајни информации за безбедноста и начинот на кој оваа пештера во иднина треба да биде претставувана пред посетителите“, кажа директорот на ЈУНП “Маврово”, Самир Ајдини.

Проектот е финансиран од страна на мрежата на заштитени подрачја “Паркови Динариди” во која со свој претставник во управниот одбор членува и Националниот Парк “Маврово”, а партнери во истиот се Спелеолошката Федерација на Македонија (СФМ) и локалното здружение на граѓани “Маврово 365”.

„Преку проектот од страна на СФМ се спроведе и обука за водичи во спелеолошки објекти за две лица. Истите се претставници на локалното неселение т.е жители на с. Маврово и со нив Националниот Парк “Маврово” ќе потпише договор за соработка. Со ова ќе се обезбеди поефикасен начин на функционирање на пештерата, ќе се обезбеди работно време кога истата ќе биде отворена а двајцата водичи во директна комуникација со хотелите, туристичките агенции, образовните институции, другите сместувачки капацитети но и угостителските објекти ќе може да договараат термини за организирани посети на истата“, додаде Ајдини.

Пештерата за туристите ќе биде достапна преку целата година. Наскоро ќе биде изготвена програма и работно време според кое истата ќе функционира. Покрај редовните и организираните посети, планирани се и ноќни тури, тури наменети за ученици и студенти и сл. Во текот на овој викенд и наредната недела влезот во пештерата за сите гости ќе биде бесплатен, но истиот ќе може да се реализира со претходна најава и во договор со одговорните лица. За повеќе информации ќе може да се обратите на 042 489 425 Туристички Информативен центар НП Маврово и 072 210 777 “Маврово 365”.