Пет повредени во сообраќајка на излезот од Гостивар

Во сообраќајна несреќа која се случила утрово околу 6 часот, на излезот од Гостивар, повредени биле пет лица. Едно од нив се здобило со потешки повреди.

Според СВР Тетово, несреќата е регистрирана на регионалниот пат Гостивар-Градец на надвозникот. Во неа учествувале:  „фолксваген-венто“ и „форд-транзит“. Возачот на вентото, 16 годишник од Гостивар кој управувал без дозвола изгубил контрола и налетал на комбето. Пет лица, од кои двајцата возачи и тројца сопатници завршиле со повреди во гостиварската болница. Едното од нив, 32 годишен гостиварец заради карактерот на повредите бил пренесен на скопските клиники.

Увид на местото на настанот извршила екипа на СВР Тетово по овластување на јавен обвинител.