Петто издание на поетскиот фестивал „Литературни искри“ во Гостивар – Конкурсот е објавен

Започнаа подготовките за петтото издание на Меѓународниот поетски фестивал „Литературни искри“ во Гостивар, кој се организира во чест на 24-ти Мај, Денот на Словенските просветители Св.Кирил и Методиј. Денес е објавен конкурсот за учество кој ги прецизира правилата за пријавување.

Во конкурсот стои дека: право да конкурираат имаат поетите од Македонија и од Балканските земји, кои ќе се натпреваруваат во две возрасни категории, до 18 години и над 18 години. Авторите испраќаат три необјавени песни на слободна тема, не подолги од 32 реда, напишани на мајчин јазик (учесниците на кои македонскиот не им е мајчин јазик, задолжително доставуваат препев на македонски јазик). Творбите се испраќаат на електронската адреса на фестивалот: literaturniiskri@yahoo.com. Крајниот рок за пријавување е 5-ти мај.

Како и секоја година, изборот на најдобрите ќе го направи стручна комисија. Фестивалот издава и заедничка збирка во која ќе бидат застапени автори за кои селекцијата ќе ја изврши комисијата.

Меѓународниот поетски фестивал „Литературни искри“ во Гостивар годинава го организира Здружението за култура „Дунек“ во соработка со Центарот за култура АСНОМ – Гостивар.

Меѓу наградените на фестивалот во претходните изданија се поетите: Стефан Марковски, Слаѓана Ставревска, Вања Савова (Бугарија), Невен Лукачевич (Хрватска), Кристина Мерклер и други.