Планинари од Гостивар ќе го искачуваат Голем Арарат, највисокиот врв во Турција

Четворица планинари, членови на Планинарското друштво „Шари“ од Гостивар попладнево тргнаа за Турција, со мисија да го искачат највисокиот врв, Голем Арарат. Снежниот врв, на надморска висина од 5.137 метри, каде моментални температури се -18 степени, е планинарскиот предизвик за гостиварците Ајфер и Керамедин Зендели, Исмет Шурбан и Џевад Нухи. На пат заминаа полни со позитивна енергија, жедни за нови планинарски авантури и подготвени за исполнување на целта.

„По успехот во Килиманџаро и Дамаванд, група од планинарското друштво „Шари“ од Гостивар тргнува за Арарат. Таму денеска испраќаме четворци наши членови. Да даде Господ да успеат во мисијата и да ни се вратат здрави и живи, тоа е најголем успех за  Гостивар. Подготовките траеа скоро три месеци, а се одвиваа на Шара и на Кораб, планинареа во најтешки услови, имаше летни качувања, па на врнежи и на невреме, сето тоа за да имаат силна кондиција затоа што без кондиција не може да се постигне целта“, рече претседателот на друштвото Ќерим Абази, кој заедно со други членови планинари ја испратија групата и им посакаа успех.

Голем Арарат (5.137 метри) во Турција, предизвик за гостиварските планинари Ајфер и Керамедин Зендели, Џевад Нухи и Исмет Шурбан.

Искачувањето на Арарат ќе се одвива во три етапи, а се очекува планинарите да стапнат на врвот на 30 август.

Планината Арарат се наоѓа во областа Источна Анадолија, недалеку од границата со Иран и Ерменија. Врвот е сместен 16 км западно од турско-иранската и 32 км јужно од турско-ерменската граница.