Платена казна од 2.000 евра за запалените гуми кај гостиварско Здуње

Општинските инспекциски служби го казнија потпалувачот на стари гуми во склад кај здуњската раскрсница со глоба од 123 илјади денари. Пожарот се случи на почетокот на месец март, а од запалените стари автобуски и камионски гуми градот беше обвиткан во црн чад.

Од локалната самоуправа денес информираа дека сторителот ја платил казната.

„Гостиварската општинска администрација е посветена во борбата против загадувањето на животната средина. Во оваа насока, комуналните инспектори и редари вршат редовни контроли и дејствуваат превентивно, а во одредени случаи преземаат и репресивни мерки, односно прекршителите ги казнуваат со глоби согласно позитивните закони. Што се однесува до последниот еклатантен  случај при што беа запалени стари гуми од возила во близина на селото Здуње, сторителот беше казнет со парична казна од 123.000,00 денари и истата е платена од негова страна.“, соопшти општина Гостивар

Локалната власт апелира до субјектите и граѓаните на Гостивар да се грижат за заштита на животната средина и најави дека комуналните инспектори ќе продолжат да бидат активни и да преземаат соодветни мерки против прекршителите.