Платите во образование ќе се покачат за 15 % – Конечен договор на СОНК и МОН

Постигнат е договор меѓу СОНК и МОН, соопштија на заедничка прес конференција по денешната средба, министерот за образование Јетон Шаќири и претседателот на СОНК, Јаким Неделков.

„На денешната средба успешно ја заокруживме дискусијата во однос на повеќе отворени прашања, за што како министер сум исклучително задоволен. Дојдовме до краен епилог, се согласивме и двете страни да ги прифатиме предлозите на медијаторот. Повисоки плати во образовани ќе има, освен порамнувањето со минималната плата, ќе има дополнително покачување на платите за 15% со исплата од септември. Исто така, нема да има кратење на платата за вработените во образованието за периодот во кој штрајкуваа“, изјави министерот.

Неделков истакна дека очекува препораките од денешниот договор да бидат прифатени од членството и во рок од 10 дена МОН и СОНК да потпишат спогодба.