По 2 милиони денари субвенции за КК и ФК Гостивар

Советот на Општина Гостивар денес изгласа одлуки за доделување субвенции на КК и ФК Гостивар. Клубовите поединечно ќе добијат по 2 милиони денари од општинскиот буџет.

Советникот Миртезан Селими од Алијанса за Албанците реагираше дека клубовите имаат спонзори  и инвеститори и не треба да се потпираат на финансиите од општината.

„Јас нема да ја поддржам оваа одлука. Фудбалскиот клуб има друг доминантен сопственик, на општината припаѓаат 49% од акциите. Ние не знаеме колку доминантниот акционер инвестира во клубот. Кошаркарскиот клуб има спонзори, општината ете помага со користење на салата и слично, а за успесите клубовите се повикуваат само на спонзорите. Треба да има пропорционална распределба на субвенции. Зошто на пример, фудбалскиот клув Форино не добил средства.“, рече Селими.

На тоа му реплицираше неговата сопартијка Њомза Шаќири, која рече дека општината сепак има обврска да ги помага клубовите и има предвидено средства во Програма за поддршка на спортот.

Со коментар се јави и советникот од Демократски сили на Ромите, Кашмир Салиу, кој истакна дека ќе гласа за одлуката, но побара подетално да се разгледуваат ваквите точки.

„Кога се доделуваат финансиски средсрва повеќе личиме на некоја хуманитарна организација. Сугерирам подетално да се разгледуваат овие точки. Јас ќе гласам за поддршка на клубовите, немам ништо против спортот. Но, треба да се мисли и на другите потреби и проекти. Општината остана глува за поддршка на проектот Ресурсен центар за Роми, за кој се‘ уште не се дадени средства“, изјави Салиу.

Освен за спортските клубови, субвенции добија и Јавните претпријатија за паркинзи и зеленило 2,5 милиони денари и за стопанисување со спортски објекти Ринија, 2 милиони денари.

На денешната седница беа усвоени и измени во годишниот план за вработување на општината. Причината за тоа како што беше објаснето, биле усогласување со новините во делот на пензионирањето.