По 5.000 до 10.000 евра за невработени кои сакаат свој бизнис, аплицирање од денес

Агенцијата за вработување ги објави јавните повици од Оперативниот план за активни програми и мерки за вработување и услуги на пазарот на трудот за  2022 година. Една од мерките е Самовработување со грант, која беше и најпривлечна за невработените во изминатите години.

Мерката обезбедува: – ваучер систем за изработка на бизнис план и поддршка при регистрирање на бизнисите ; – неповратни средства (грант) во износ  од  307.500 денари по корисник или до 615.000 денари доколку се основа правен субјект од два содружника како ДОО – Друштво со ограничена одговорност од две лица, при што секој од содружниците ќе има еднаков (50%) удел во друштвото.

Право на аплицирање имаат: невработени млади лица до 29 години, невработени лица со попреченост, невработени лица – мажи до  60 години и жени до 58 години, жени-жртви на родово базирано насилство и жртви на семејно насилство, невработени лица кои сакаат да го формализираат својот бизнис-мажи до  60 години и жени до 58 години, невработени лица Роми-мажи до  60 години и жени до 58 години, невработени лица поради корона вирус-мажи до  60 години и жени до 58 години и невработени лица повратници (повратниците од странство припадници од Ромската заедница и други лица во ризик од социјално и економско исклучување кои влегуваат во потенцијални повратници во иднина во општините Шуто Оризари, Штип и Прилеп)

Аплицирањето е до 15 април, а заинтересираните треба да се обратат во Центарот за вработување.