По 90-тина невработени месечно „паѓаат“ од евиденцијата на Центарот во Гостивар

Невработени лица во Гостивар, кои се регистрирани како активни баратели на работа, се бришат од евиденцијата на Центарот, поради нередовно пријавување. Тие имаат обврска, секој месец лично да се појават во институцијата со својот евиденциски картон за да им се ажурира статусот, но многумина не си ја исполнуваат. Таквите автоматски „паѓаат“ од листата и го губат правото на пријавување во период од една година.

„Тие што се активни баратели на работа мора да се пријавуваат секој месец лично. Ако не се појават добиваат забрана од една година. Може да кажеме дека имаме многу такви случаи кои не се пријавуваат, месечно од 90 па до 100 и сите го губат правото. Секој што е заинтересиран за вработување треба да знае дека има обврска да се пријавува, апелираме до невработените тоа го прават редовно и навреме“, кажа Вотим Емшиу, раководител на гостиварскиот Центар за вработување.

За разлика од активните баратели на работа, останатите пријавувањето го вршат на секои шест месеци.

Според податоците од институцијата во трите општини што ги покрива: Гостивар, Врапчиште и Маврово Ростуше регистрирани се 9.880 невработени лица. Над 6.000 се со основно или без образование, педесетина се магистри на науки и еден доктор на науки.