По две децении без шпански тимови на Ф4 – Евролигата 2025 завршува во Абу Даби

Познати се четирите учесници на завршниот турнир за сезоната 2024/25 ќе се одржи од 23 до 25 мај во „Етихад Арена“ во Абу Даби. По 21 година континуитет, ниту еден шпански тим нема да игра на фајнал-фор на Евролигата.

За шампионската титула ќе се борат четири екипи: Фенербахче (Турција), Олимпијакос и Панатинаикос (Грција) и Монако (Франција). Во полуфиналните натпревари на 23 мај се среќаваат Олимпијакос – Монако и Панатинаикос – Фенербахче, додека големото финале е закажано за 25 мај.

Барселона беше елиминирана од Монако со 3:2 во четвртфиналната серија, а Реал Мадрид загуби од Олимпијакос со 3:1. Басконија не стигна до плејофот, што значи дека за првпат од 2004 година, ниту еден шпански клуб нема да биде дел од „големата четворка“. Последниот фајнал-фор без Шпанци се одигра во Тел Авив, кога Макаби ја освои титулата победувајќи го Скипер Болоња во финалето.

Овогодинешниот настан ќе се игра во капацитетната и модерна Етихад Арена, која прима до 18.000 гледачи, а организаторите очекуваат глобален интерес и нов импулс за популаризација на кошарката на Блискиот Исток.