По две паузи за консултации гостиварскиот Совет едногласно го усвои ребалансот на буџетот

Со 29 гласа ЗА, без против и воздржани, и без многу дискусија, Советот на Општина Гостивар, денес го изгласа ребалансот на буџетот за 2019-та година. Како што објаснија од Секторот за финансии, во ребалансот има измени, дополнувања и проширувања во повеќе програми и потпрограми, односно одземања на средстава кадешто не се реализирани, и нема да се реализираат до крајот на годината, и додавање кадешто се јавува потреба. Одредени измени има и делот на капиталните трошоци.

„Имаме измени и во делот на капиталните трошоци, на пример за купување на основно средство камион за потребите на јавните претпријатија, преку грант од Светска банка и таа измена е потребна да се направи, затоа што не сме имале таква позиција во таа колона. “, рече Садри Елези од општинскиот сектор за финансии и буџет.

Усвојувањето на ребалансот, дојде по две паузи кои беа побарани за консултации и без присуство на двајцата советници на НДП.

На седницата беше усвоена и промената на Статутот на Општина Гостивар, каде зборовите „Република Македонија“ се заменуваат со „Република Северна Македонија“. Советничката група на ВМРО-ДПМНЕ бараше изземање на оваа точка на дневниот ред, но нивниот предлог не беше прифатен, по што промената се усвои со 25 гласа ЗА и три гласа (ВМРО-ДПМНЕ) ПРОТИВ.

Седницата, на чиј дневен ред беа над 70 точки, по изгасувањето на првите три точки беше прекината, со образложение дека дел од советниците имале неодложни обврски.