По пет до десет гостиварци дневно во болница од горештините

Топлотниот бран удри по здравјето на граѓаните. Екстремно високите температури кои владеат изминатиот период создаваат здравствени тегоби, а најчесто страдаат хронично болните лица. Лекарите од Ургентниот Центар во општата болница во Гостивар потврдуваат дека секојдневно примаат пациенти со нарушено здравје предизвикано од жешкото време. Периодов, од пет до десет граѓани дневно, погодени од пеколните горештини бараат помош на ургентно.

„Најголемиот дел се пациенти со хронични заболувања кои тешко го поднесуваат топлото време. Значи станува збор за дијабетичари, лица со срцеви проблеми, покачен крвен притисок, а ги има од сите возрасти“, објаснуваат од Ургентниот Центар.

Здравствените власти на почетокот од неделава излегоа со препораки за заштита од топлотниот бран.  Министерството за здравство препорача од работни обврски да се ослободат бремените жени и хронично болните лица на возраст над 60 години, а работодавачите да го реорганизираат работното време  со цел да се избегнуваат активности на отворено во периодот од 11 до 17 часот. На граѓаните пак им препорача заштита од директна сончева изложеност, избегнување престој на отворено во периодот од 11 до 17 часот, носење светла и лесна облека, консумирање лесна храна и течности и хигиенски начин на подготовка на храната.

И покрај сериозните укажувања на опасноста од високите температури, деновиве може да се сретнат градежни работници кои работат во најтоплиот дел од денот, продавачи кои изложуваат расиплива роба на отворено, повозрасни лица кои шетаат без заштита, капи и слично.