Почина Љубиша Георгиевски (1937-2018)

Утрово на 81 година почина театарскиот и филмски режисер, драмски писател и есеист, теоретичар на театарот и професор по театарска режија и актерска игра Љубиша Георгиевски.

Како политичар, беше претседателски кандидат, амбасадор во Бугарија и Србија и претседател на Собранието на Република Македонија.

Роден е во Битола на 30 мај 1937-та година.

Дипломирал на Академијата за театар, филм, радио и телевизија, група „Театар и радио режија”, во Белград, 1974.

Како театарски режисер, има поставено преку 160 постановки во Македонија, Србија, Хрватска, Босна и Херцеговина, Словенија, Бугарија, Романија, Полска и други држави, како и четири постановки во САД, каде на универзитетите во Јужна Калифорнија и Тексас предавал теорија на театарот и актерска игра. Неговите претстави се играат на повеќе од десет јазици и истите гостувале ширум Европа, од кои позначајни гостувања се во Москва и Виена.

Има објавено десеттина книги, а како филмски режисер има режирано четири филма. Како новинар има напишано преку двесте авторски колумни во „Дневник”.

Добитник е на повеќе од дваесетина награди во рамките на поранешна Југославија, како и наградата од критиката за претставата „Искушение” од Вацлав Хавел во Theater Center како најдобра претстава на театарската сезона. Неговите пиеси „Црна” и „Јованка Орлеанска” се играни со успех, а некои од нив сè уште се на репертоарот.