Почна аплицирањето за субвенции преку „Купи куќа-купи стан“

Објавен е јавен повик на кој граѓаните можат да аплицираат за субвенција за станбен кредит од државата, преку проектот „Купи куќа, купи стан“. Рокот трае до 31 декември 2021 година. Граѓаните можат да аплицираат за 6 различни модели кои нудат различни поволности согласно тоа дали сакаат да аплицираат за субвенционирање на месечна рата на кредитот или за учество, во зависност од тоа дали аплицираат за купување на стан или куќа и во зависност од возраста.

Од Министератсвото за финансии објаснуваат дека за проектот може да аплицираат лица кои се или не се во брак, a кои ги исполнуваат следните услови: не смеат да имаат стан или куќа на свое име или на име на брачниот другар, месечните приходи не смеат да надминуваат 900 евра доколку не се во брак или 1.300 евра доколку се во брак, продажната цена на станбениот објект мора да биде до 900 евра за метар квадратен и станот и куќата кои се купуваат или градат мора да бидат новоградба, односно да се купат од инвеститор или изведувач. Исто така станбената површина не смее да надминува 150 м2

Минатата година преку проектот биле одобрени 278 барања за субвенциониран станбен кредит, од коишто 259 се за купување нов стан, а 19 за изградба на куќа. Вкупно од почетокот на проектот досега одобрени се 1.693 барања за купување на стан или куќа, или скоро 1.700 граѓани или семејства преку проектот дошле до сопствен дом.