Почна Галичка свадба 2023, чувар на вековни македонски традиции

Со изведување на низа обичаи и традиции, вчеравечер почна годинешното издание на манифестацијата Галичка свадба. Годинава, својата љубов според вековните галички адети ќе ја крунисаат младенците Оливер Андреевски и Елисавета Булоска.

Како што е редот, свадбата почна со редење, китење и веење на свадбарскиот бајрак, пукање три пушки од балконот на куќата на зетот, а потоа продолжи со играње на свекрвино и невестинско оро, Тешкото, и обичајот на одење по вода на три чешми.

Денес наутро, манифестацијата продолжува со обичаите на канење на мртвите, канење на кумот, бричење на зетот, гледање низ прстен, земање на невестата, венчавање итн. Венчавањето на младенците во црквата Свети Петар и Павле ќе се одвива во 12 и 30 часот, а манифестацијата се заокружува со испраќање на топаните кои свекорот ги дарува со пари.

Во реализацијата на оваа културно-туристичка атракција вклучени се околу 250 луѓе: техничка поддршка, учесници, зетот и невестата, нивните фамилии, пријатели и останатите учесници во свадбата.

За време на викендов во Галичник има сообраќаен режим, каде паркирање на потегот каде што се одвива Галичката свадба и каде што се одвиваат обичаите, не е дозволено.

Галичката свадба е во организација на МЗ Галичник.

фото:МЗ Галичник